ಫರ್ಡಿ 01
ನ್ಹಂಯಿ ಸಾಂಗ್ಚೆ
ಕಸನೆ ಮ್ಹಳೆರಿ, ಹಾಂವ ಆಸ್ಕಿನಾ ಸಾನ ಆಸ್ತಾನ, ನಂಯಿ ಸಾಂಗ್ಚೆ, ಆಸ್ಕಿನಾ ಆತ್ತಾಂಚೆ ವರಿ ನಾ ಆಸ್ಸಿಲೆ, ತುಕ್ಕ ಹಾಂವೆ ಸಾಂಗೂಕ ಮೊಣು ಆಸ್ಸವೆ? ತೂಂವಯಿ ಮಿಗೆಲೆ ಒಟ್ಟೂ ಹೋಡ ದಾಲ್ಲಲೊ ನಂವೆ!
ವ್ಹಯಬಾ
ಸಕಾಣಿ ಉಟಾನು ಪಾಯ್ಕಾನೆಕ ಗುಡ್ಡೇರಿ ವಚ್ಕ, ಮಾಗಿರಿ ಚಡ್ಡಿ ಹಾತ್ತಾ ಧೋರ್ನು, ಸಾಧ್ಯ ಆಸ್ಸಿಲೆ ತಿತ್ಲೆ ಅಡಾರ, ರಾಕ್ಕೂಡ ಮಾತ್ತೆರಿ ಹಾಣು, ಕೊಟ್ಗೆ ಬಾಗ್ಲಾ ಉಡೊನು, ನಾಣ್ಯೆ ವಚ್ಚೂನು ಗಾಂಡಿ ಧೂವ್ನು, ಆಂಬೆ ತಾಳೊ ಕಿ ರಾನ್ನಿ ವಿಂಗಳೊ ಕಿ ತಾಜ್ಜೆನ ದಾಂತ ಘಾಸುನು ಆಮ್ಮಾ ರಾಕ್ಚೆ.
ಫೋವು ಕಿ ರುಲ್ಲಾಂವು ಕಿ, ಮೀಟ ಮಿರ್ಸಾಂಗ ದಾಕ್ಕೊನು ಪಾತsಳಿ ಗೊಡ್ಡಾ ಕಾಫಿ ಥೆಂಬೊ ದೂದ ದಾಕ್ಕೊನು ಚೆರ್ಡಾ ಯೋರೆ ಮೊಣು ದಿಲ್ಲೆರಿ ಸಕಣ್ಚೆ ಏಕ ಕಾಮ ದಾಲ್ಲೆ.
ಮಾಗಿರಿ ಸ್ಕೂಲ. ಉಂಬಳೇಲಿ ಫುಟೀಚಿ, ಆಸ್ಸಿಲೆಂತು ಚಾಂಗಿ ಫರ್ಕಟಿ ಚಡ್ಡಿ ನೆಸೂನು ಸ್ಕೂಲ ಧಾಂವ್ಚೆ. ಸಾಂಜ್ವಾಳ ತಾಂಯಿ ಪಾಠು ಖೇಳು, ಭೂಕ ಗೀಕ ತಾನ್ನಿಚೆ ಸಕಡ ವಿಸೊರ್ನು ಆಸ್ತಾ. ಸ್ಕೂಲ ಸೋಣು ಎತ್ತಾನ ರೆಡಿ-ದಾಟೀ ಪ್ಯಾಜ, ಜೀವಕಾಯಿ ಚಾಂಗ.
ನಂಯಿ, ಆಜಿ ಕಾಲಿ, ಚೆರ್ಡುವಾಂಕ ಸಾಂಗ್ಲೆರಿ ಫಟ್ಟೀಚಿ ಮ್ಹಣ್ತಾತಿ. ಆಜಿ ಆಸ್ಸಿಲೊ ಸವಲತ್ತು ಎಕ್ಕಯಿ ನಾ ಆಸ್ಸಿಲೆ ಮಳ್ಳೆರಿ ನಮ್ಗತಾವೆ! ತುಕ್ಕ ಗೊತ್ನಾಂವೆ. ಎಕಕ ವಳಾ, ಆಮ್ಕಯಿ ಆಶ್ಚರ್ಯ ದಿಸ್ಸಾನಾವೆ. ಘರಾಂ ಭರಿ ಆಟ್ಟಾಟ ಚೆರ್ಡುಂವ, ದಿಸಾ ಸಂಪಾದಾನೆಂತು ಚಾರಿ ಪೆಜ್ಜೆ ಕುಂಯ ಚೆರ್ಡುಂವಾ ದಾಕ್ಕೊಚೆಕ ಏಳ ಹನ್ನೊಂದು ದಾತ್ತಾಲೆ ಆವ್ಸು ಬಾಪ್ಸೂಂಕ.
ಏಕ ಐಸ್ ಕ್ರೀಮ ಕಿ, ಕೊಕ್ಕಾ ಕೋಲ ಕಿ ಪಿತ್ತ ಮಳೆ ಆಸ್ಕಿಲ್ಕೀ! ಆಸ್ಲೆರಿ ಘೆವ್ಚೆ ಸಾಧ್ಯ ಆಸ್ಸಿಲ್ಕೀ! ತುಕ್ಕ ಗೊತ್ನಾಂವೆ?..ನಂಯಿ ಸಾಂಗ್ಚೆ. ಸಂಜೀವಮಾಮ್ಮಾಲೆ ಗೋಳಿ ಸೋಡೊ. ತೇಂಚಿ ಹೋಡ... ಗಮ್ಮತ ಮಳೆರಿ ತೇರಾಕ ಅಂಬ್ಡಿ ಗಾದ್ದೆ ಜಾತ್ರೆಕ ಸಾಕ್ರೆ ಮಿಠಾಯಿ, ಚಾರ್ಮುರೆ ಉಂಡೊ, ಹಾಂ ಐಸ್ ಕೇಂಡಿ ಕಸಲೆಂ ಘೆವ್ಕಾ ದಾಲ್ಲೆರಿ ಆನ್ನಾಲೆ ಕಿತ್ತುಲೆ ಲಾಂಬ್ಕಾ ಪಡ್ತಾಲೆ!! ನಯಿಂವೆ, ತುಕ್ಕ ಗೊತ್ನಾವೆ! ನಂಯಿ ಸಾಂಗ್ಚೆ..
ಆಜಿ ಕಾಲಿ ಪಳೆ ಕಾಲು ಕಸ್ಸಿ ರಾಬ್ಲೊ. ಏಕ ಪರ್ಕಟ ಸೈಕಲ ಆಸ್ಸಿಲೊ ಹೋಡು ಮನೀಷು! ಆಜಿ? ಪಳೈತ್ಮೂ ತೂಂವ, ಘರಾ ಚಾರಿ ಮೋಟರ್ ಸೈಕಲ, ಘರಘರಾ ಕಾರ ನಮೂನವಾರ. ಲಕ್ಷಾಕ ಕಿತ್ಲೆ ಸೊನ್ನೆ ಮೊಣು ಗೊತ್ತಸ್ಸಿಲ್ಕಿ? ಆಜಿ! ನಂಯಿ ಸಾಂಗ್ಚೆ, ಚಾರಿ ಲಕ್ಷ ತುಕೂನು ವೀಸ ಬಾವೀಸ ಲಕ್ಷಾಚೆಂಯಿ ಕಾರವೇ! ನಂಯಿ ಸಾಂಗ್ಚೆ, ಹಾಕ್ಕಾ ಕಸನೆ ಮಣ್ತ ತೂ.! ಸೂಣೆ ಮಾಜ್ರಾಲೆ ವರೇನ ಕಾರ. ನಂಯಿ ಆಮ್ಮಿ ತಸ್ಸಿ ಸಾಂಗ್ಚೆ ನಜ್ಜ. ದಾಲ್ಲೆರಿ ವ್ಹಯಿ ಕಿ ನೈ..!!
ಉಲ್ಲೋಚೆ ಸೂರು ಕೆಲ್ಲೆರಿ ವಿಷಯು
ಖಂಯಿಖಂಯ್ಕಿ ವತ್ತಾ. ಹಾಂವ ಸಾಂಗೂಕ ಮಳಾಲೊ ವಿಷಯು ಬಾಕಿ ವರ್ಲೊ.
ಆಜಿ ಕಾಲಿ ಸದಂಚಿ ಆಯ್ಕತಮೂ, ತಾಗೆಲೊ ಚಲ್ಲೊ ಅಮೆರಿಕಾ ಗೆಲ್ಲೊ, ಹಾಗೆಲೊ ಪೂತು ಲಂಡನಾ ಆಸ್ಸ, ತಿಗೆಲೆ ಧುವೇಲೊ ಜಾಂವಂಯಿ ಸ್ಯಾನ್ ಹೋಸೆ ಮ್ಹಣಂಚೆ ಗಾಂವಾಂತು ಕಂಪೆನಿ ಕಾಮಾ ಆಸ್ಸಖೈಂ.! ಸಾನ್ ಹೋಸೆ ಕಿ ಹೋಡ ಹೋಸೆ ಕಿ! ಆಮ್ಕಾ ಭಾಲ್ತವೆ? ನಂಯಿ ಸಾಂಗ್ಚೆ, ಗಾಂವಾಂತು ಹರ್ದೆ ನಿಟs ಕೋರ್ನು ಸಾಂಗಿಲೆ ತಾಂಗೆಲೆ ಆವ್ಸು ಬಾಪ್ಪೂಸು ನಾಸಿಲ್ವೆ! ಆತ್ತ ಹಾಂಗಾ ಘರಾಂತು ಮಾಂಥಾರೆ ಆವ್ಸು ಬಾಪ್ಪೂಸು ಮಾತ್ರ, ತಿಗೆಲೆ ತೋಂಡ ಹಾಣೆ ಪೊಳೋಚೆ, ಹಾಗೆಲೆ ಖಾಂಕಿ ಹೀಣೆ ಆಯ್ಕೂಚೆ.... ನಂಯಿ ಸಾಂಗ್ಚೆ, ಕಸನೆಯಿ ನಜ್ಜ ಜಾಲ್ಲೆಂ ಮಳೆರಿ ಆಸ್ಸವೆ ಚೆರ್ಡೂಂವ! ಫಕ್ಕನೆ ಯೇವ್ಯಾಂ ಮಳೆರಿ ಲಾಗ್ಗಿ ಪಳ್ಳಾಂವೆ? ಧಡ್ ನೆ
’ಗ’ ಘಾಲ್ಲೆರಿ ರಜೊ ಗೀಜೊ ಸುಲಭೇರಿ ಮೆಳ್ಳೆರಿ ತಿನ್ನಿ ದಿಸಾ ಗೊಬ್ಬೋರು ಭೊರೂಂಕ ಎವ್ಯೇತ ಕಿತ್ಕೀ! ನಂಯಿ ದಾಲ್ಲೆರಿ ವೈಕುಂಠಾಕ ಯೆವ್ಚೆ ದಾಲ್ಲೆರಿ ಹೋಡ ಪುಣ್ಯ. ನಂಯಿ ಸಾಂಗ್ಚೆ. ಕೆಲವ ವೆಳಾ ವರ್ಷಾಂತಿಕಾ ಟೈಮಾರಿ ಯೇವ್ನು ಸಕ್ಕಡ ಕೋರ್ನು ಗೆಲ್ಲ ಖಂಯಿ ಮೊಣು ಆಯ್ಕನಿವೆ ತೂಂವೆ!
ನಂಯಿ ಸಾಂಗ್ಚೆ
ಎಕ್ಕೆಕ್ಲೇಲಿ
ಆಲೋಚನ ಎಕ್ಕೇಕ ನಮೂನೊ, ಆಮ್ಮಿ ಕಾಂಯಿ ಸಾಂಗಚೆ ಆಸ್ಸವೆ? ನಂಯಿ ಸಾಂಗ್ಚೆ, ತೇ ಏಕ ಚಂದಾಯಿ ವೆ..!
ಆಮ್ಗೆಲೆ ಚೆರ್ಡುಂವಾನಿ ತಸ್ಸಿ ದಾವ್ಕ ಅಸ್ಸಿ ದಾವ್ಕ ಮೊಣು ಆವ್ಸು ಬಾಪ್ಪೂಸು ಭೊಗ್ಚೆ ವಾವಾಂಟ ಕಿತ್ಲಿ!
ಕಾಳ್ಳೆಲಿ ಯೆಚ್ಚಾನಾ ಸಕಡ ಕಸಲೆ ಖಾತ್ತೀರ? ಚೆರ್ಡುಂವ ಹಾಂಗೆಲೆ ಆಶೆ ಸಮs ದಾವ್ನು ಸುಖಾರಿ ಪಳ್ಳೀಂತಿ
ವ್ಹಯಿ. ದಾಲ್ಲೆರಿ ಹಾಂಕಾ ಮಾಂಥಾರ್ಕಾಲಾರಿ? ಇತ್ಲೇಂಚಿವೆ..! ನಂಯಿ ಸಾಂಗ್ಚೆ...
--------O--------
ಫರ್ಡಿ
02
’’ಬಾಪ್ಪ ಹಾವ”
‘’ಕಸನೆ ಸಾಂಗರೆ”
‘’ನಂಯಿ ಹಾಂವ ಹಾಂಗಾ ಮಾಳ್ಶಿ
ದೇವಾಸ್ಥಾನಾ ತುಕೂನು ಉಲ್ಲಯ್ತಾ’’ ಮೆಗೆಲೆ ಮಾಂಥಾಲೆ ನಾತ್ವಾಲೊ ಫೋನು ಆಯ್ಲೊ.
ಮಿಗೆಲೆ ಆನು, ಮಾಂಥು, ಆನಿ ಬಾಪ್ಪ
ತೆಗ್ಗ ಜನ ಬಾಬ್ಭಾವ. ಕಾಪಾಡಿ ಸಾಗ್ವಳಿ ಕೋರ್ನು, ಜೀವನ ಚೊಲೋಚೆ ದಾಯ್ನಾ ಮೊಣು ಪೆರ್ಡೂರ - ಹೆಬ್ರಿ
ಯೇವ್ನು ಸೆರ್ವಲೆಲೆ. ಬ್ರಿಟೀಷಾಲೆ ಗತ್ತು ಗೈರತ್ತಾ ಕಾಲು, ಭಾರೀ ಕಷ್ಟಾ ದಿವಸ. ತೇ ತಾಪತ್ರಯಾ ಟೈಮಾರಿ
ಕಸ್ಕಸಲ್ಕೀ ವ್ಯಾರು ಉದ್ಯೋಗು ಕೋರ್ನು ಜೀವನ ಕೆಲ್ಲೆಲಿ ಮನ್ಷ. ಹಾಜ್ಜೆ ಮಧ್ಯೆ ಸ್ವಲ್ಪ ಮಟ್ಟಾಕ ದೇವು
ಧರ್ಮು ಮೊಣು ಪರ್ಬೊ ಸಕ್ಕಡ ಆಮ್ಮೆಥಂಯಿ ಚೊಲ್ಚೆ ಆಸ್ಸಿಲೆ. ತಸ್ಸಿದಾಂವ್ನು, ನಂತವೈಲೆ ಚೆರ್ಡುಂವ,
ನಾತ್ರಾಂಕ ರೆಫರೆನ್ಸಾಕ ಮ್ಹಾಲ್ಗಡೇಲೆ ಮಳೆರಿ ಆಮ್ಮೆಲೆ ಘರ. ಆಜಿ ತೆಗ್ಗ ಜನಾಲೆ ಚೆರ್ಡುಂವ ಮುಕ್ತ
ದಾವ್ನು, ನಾತ್ರಾಲೊ ಕಾಲು. ವರ್ಲೆಲೆ ಚೆರ್ಡುಂವಾ ಪೈಕಿ ಕುಟುಂಬೇಕ ಅಧಿಕೃತ ಬಾತ್ಮೀದಾರು ದಾಂವ್ನು
ಹಾಂವ ಏಕ್ಸೆಪ್ಟ್ ದಾಲ್ಲಾ. ತಸ್ಸಿ ದಾವ್ನು ಹಾಗೆಲೆ ಪೋನು..
‘’ಕಸನೆ ವಿಷಯು ಮೊಣು ಸಾಂಗರೆ”
‘’ಮೆಗೆಲೊ ಪೂತು ಮಾಲ್ಗಡೊ ಕಾಮ ಕೋರೂಂಕ ಇಂಟ್ರೆಸ್ಟ ನಾ ಮ್ಹಣ್ತಾ..!” ತಾಕ್ಕಾ ಚಿಂತಾ.
‘’ತೊ ತಿತ್ಲೆ ಶಿಕ್ಕೂನು ಲಾಯೇಕ ಜೊಬಾರಿ ಆಸ್ಸಮೂ.!”
‘’ತೇಂಚಿ ಕಸಲೆ ಮೊಣು ಕಳ್ನಾಸಿ ಹಾಂಗ ಏಕ ಜೋಯ್ಸಾಲೆ ನಿಮ್ಗೀಲೆ. ಕುಟುಂಬಾಕ ಪ್ರೇತಬಾಧಾ ಆಸ್ಸ ಮಳಾಲೊ, ತೆ ನಿಮಿತಿ ಆಜಿ ಹಾಂಗಾ ಗ್ರಾಮ ಪುರುಷಾಲೆ ಪ್ರಶ್ನೊ ದವರ್ಲೊ. ಮಿಗೆಲೆ ಆನ್ನಾಪಶಿ ಫೂಡೆ ದೋನಿ ಚೆಲ್ಲೇ ಆಸ್ಸತಿ, ತಾಂಕ ಮೋಕ್ಷು ಮೇಳ್ನಿ ಮಳ್ಳೆ. ತುಕ್ಕ ತೆ ಬದಲ ಕಸನೆ ಗೊತ್ತಸ್ವೆ?”
ವಿಷಯು ಹಾಂವ ದಾವ್ಕಾ ದಾಲ್ಲೆ ಪಸಿ ತೀಸ ವರ್ಸಾ ಫುಳ್ಳೊ. ತೆ ಕಾಲಾಚೆ ಆತ್ತ ಕೊಣಯಿ ವರ್ನೀಂತಿ. ನಂತರ ಕುಟುಂಬೆ ತರ್ಪೇನಿ ತಾತ್ತಾವಳಿ ಆರೂಢ ಪ್ರಶ್ನೊ ಹೆಂ ತೇಂ ಕೋರ್ನು, ತಿಂತೀನಿ ವಳ ಸಕಳ ಪ್ರೇತೋದ್ಧಾರ, ಉಚ್ಛಾಟನೆ ದಾವ್ನು ಕುಟುಂಬೇಚೆ ಮೂಲಸ್ಥಾನಾರಿ ಕಾರ್ಯಕ್ರಮು ಕುಟುಂಬೆ ಬರೆಪಣಾ ಖಾತ್ತೀರಿ ಚಂದಾಯೇರಿ ಚಲ್ತ ಆಸ್ಸ. ಇತ್ಲೆ ಆಸ್ತಾನ ಹಿ ನವೀ ಸಮಸ್ಯ ಖಂಯಿ ತುಕೂನು ಆಯ್ಲಿ ಮೊಣು ದಿಸ್ಲೆ.! ಚಾಲ್ಲೆಕ ಕೊಣಯಿ ಡಾಕ್ಟ್ರಾಲೆ ಕೌನ್ಸೆಲಿಂಗಾಕ ವ್ಹರ ಮೊಣು ಸಾಂಗ್ಯಾವೆ ಮೊಣು ಆಲೋಚನ ಆಯ್ಲಿ.ದಾಲ್ಲೆರಿ ಅಪಾರ್ಥು ಕೋರ್ನು ಘೆತ್ಲೆರಿ ಕಷ್ಟ ಮೊಣು ನುತ ರಾಬ್ಲೊ.
ಮಾಕ್ಕಾ ಆಜ್ಜಿಕಯಿ ಅರ್ಥ ದಾಯ್ನಾತ್ತಿಲೊ ವಿಷಯು:
೦೧- ಪ್ರೇತ ದಾವ್ಚೆ ಕಶ್ಶಿ? ಅವಘಡ ದಾವ್ನು ಅನಿರೀಕ್ಷಿತ ಮರಣ ದಾಲ್ಲೆರಿ ಬಾರತೇರ ಇತ್ಯಾದಿ ಕರ್ನಾಸಿ ವೋರ್ನು ಗೆಲ್ಲೆರಿವೇ?
೦೨- ಮಾಗಿರಿ ಕುಟುಂಬ ಮಳೆರಿ ಕಿತ್ಲೆ ಮಾಕ್ಷಿ ವಚ್ಕಾ..! ಆಜ್ಜೊ ಪಿಜ್ಜೊ ಹೆ ಕ್ರಮಾರಿ ಖೈಂ ತನಕ..?
೦೩- ಗೋಯಾಂ ತುಕೂನು ಘರ ದಾರ ಸೋಣು ಆಯಿಲೆ ಆಮ್ಮಿ. ಕಸ್ಸಿ ಕಸ್ಸೀಂಕಿ ಜೀವನ ಚೊಲೋನು ಆಯ್ಯಿಲೆ, ತೆ ವೆಳೇರಿ ಕೊಣ್ ಕೋಣ ಕಸ್ಸಿ ಮೆಲ್ಲೆ? ತಾಂಗೆಲೆ ಸಕಡಾಲೆ ಕಾಮ ಕ್ರಮಾರಿ ದಾಲ್ಲಾಂವೆ! ಕೋಣೆ ಲೇಕ ದವರ್ಲಾ? ಡೀಪ್ ಗೆಲ್ಲತಶೀಂ ಪ್ರತಿ ಎಕ್ಲೆಲೆ ಕುಟುಂಬೇಂತು ಶಂಬರಿ ಗಟ್ಲೆನ ಪ್ರೇತಾತ್ಮ ಆಸ್ಸೆ ಫೂರೋ ಮೊಣು ಘಾಬರಿ ಸುರು ದಾತ್ತಾ.
೦೪- ಹಾಜ್ಜೆ ನಿವೃತ್ತಿ ಕಶ್ಶಿಂ? ಭಟ್ಟಮಾಮ್ಮಾಲೆ ನಿಮ್ಗಿಲೆರಿ, ತಾಂಗೆಲೆ ಮಾಲ್ಗಡೇನಿ ಪಾಠಶಾಲೆಂತು ಸಿಕಯ್ಲೆ ಪ್ರಕಾರ ತಾನ್ನಿ ಕರಯ್ತಾತಿ. ಮಸ್ತ ಕಡೇನ ಅಸ್ಸಿ ಸಕ್ಕಡ ಕೋರ್ನೂಯಿ ’ನಾ ನಿವೃತ್ತಿ ದಾಯ್ನಿ’ ಮೊಣು ಪ್ರಶ್ನೇರಿ ದಿಸ್ಸೀಲೆ ಆಸ್ಸ’.
ಆಸ್ಸೊ…ಆಮ್ಕಾ ಹಿ ಬಾಧಾ ಮೊಣು
ದಿಸ್ಚೆ ಕಸ್ಸಿ:..
‘ಘರ್ಕಡೆ ಕೊಣಾಕಯಿ ಹುಷಾರ್
ನಾ, ಕೆಲ್ಲಕೆಲ್ಲೆಲೆ ವ್ಯಾರಾಂತು ನಷ್ಟ, ಅವಘಡ ವೈರಿವೈರಿ ಅಸ್ಸಿ ಆಯಿಲೆ ತಾವಳಿ. ಆಮ್ಮಿ ದಾಲ್ಲೆಲಿ
ಘಡಿ, ಆಮ್ಗೆಲೆ ಜಾತಕಾರಿ ಬಸ್ಸೀಲೆ ಗ್ರಹ, ಘೆತ್ತಿಲೊ ಜಾಗೆಚೆ ವಾಸ್ತು, ಘರಾ ವಾಸ್ತು, ಚಾರ್ಡಾನ ದಾಲ್ಲೆಲೆ
ವೇಳ,ಕೊಣಾಲ್ಕಿ ದೃಷ್ಟಿ ಅಥವಾ ಶಾಪು ಇತ್ಯಾದಿ ಇತ್ಯಾದಿ ಹೀಂವೈ ಕಾರಣ ದಾವ್ಯೇತಮೂ. ಪ್ರಶ್ನ ನಿಮ್ಗೂಚೆ
ಗೆಲ್ಲೆರಿ ತಾಣೆ ಅಸೀ ಏಕ ಸಾಂಗ್ಚೆ.! ಖಂಚೆಯಿ ಏಕ ವ್ಹಯಿ ಸೀ ದಿಸ್ತಾ, ತೇ ಸಾಂಗ್ತಾಲೆ ವರೆ ಗೊತ್ತಸ್ಸ.
ಇತ್ಲೊ ದುಡ್ಡು ಖರ್ಚು ಕೋರ್ನು ಮನಾ ಸಮಾಧಾನ ಪಾವ್ಚೆ. ಮುಕಾರಿ ದಾವ್ಚೆ ದಾತ್ತಾಚಿ. ತೇ ಆಮ್ಗೆಲೆ
ನಿಡ್ಲಾರಿ ಬರಯಿಲೆ ಚುಕ್ಕೋಚೆ ದಾತ್ತವೆ ಮೊಣೋನು ಘೆತ್ತಾ.
ಅಸ್ಸಿ ಆಲೋಚನೆ ಪುನರಾವರ್ತನೆ
ದಾವ್ನು ಗೊಂದೋಳು ದಾಲ್ಲೆ.
--------O--------
ಫರ್ಡಿ ೦೩
ವಿಚಾರು ಕೊರೂಂಕ ನಜ್ಜ ಮೊಣು ಏಕು ವಿಚಾರು, ಮನಾ ಭಿತ್ತರಿ ಕೆದ್ದಾನ್ಕಿ ರಿಗ್ಗೂನು ಬಸ್ಸಿಲೊ, ಕಾರಣ ನಾಸಿ ನಯಿ....
ವೈಯಕ್ತಿಕ ವಿಷಯಾ ಸಂಬಂಧ ಪಾವಿಲೊ ಮೊಣು ದಾಲ್ಲೆರಿ ತೆ ಕಾರ್ಯರೂಪಾ ಹಾಡ್ಚೆ ಪ್ರಯತ್ನ ಕೆಲ್ಲೆ ದಾಲ್ಲೆ. ತಾಜ್ಜೆ ಫಲಾಫಲ ಮಾಕ್ಕ ಮಾತ್ರ. ತಾಜ್ಜೆ ಸುಖ ಕೀ ಸಂಕಟ ಕೀ ಭೊಗ್ಚೆ ಹಾಂವೇಚಿ, ಕಷ್ಟ ನಾ.
ಆಮ್ಗೆಲೆ ಬಗ್ಗೆ ಮಾತ್ರ ವಿಚಾರು ಕೆಲ್ಲೆ ಪೂರ್ವೆ! ಬಂಧು ಮಿತ್ರ, ಸಮಾಜ ಬದಲ ವಿಚಾರ ಕರ್ನಾ ದಾಲ್ಲೆರಿ ಮನೀಷು ಮಣ್ತಾವೆ?
ಸಾಂಗು ಗೆಲ್ಲೆರಿ ಏಕ ರಾಶಿ ವಿಷಯ ಆಸ್ಸ, ಹಾಂಗಾ ಆಶ್ಚಿ ಸಮಸ್ಯಾ.
ಲೋಕಾಂಕ ಅಗತ್ಯ ಆಸ್ಸ ಕೀ ನಾಂಕಿ. ಮನಾ ಆಯ್ಯಿಲೊ ವಿಷಯ ವಿಸ್ತಾರ ಕೋರ್ನು, ಮಿಗೆಲೆ ತೂಕ ಚಾರಿ ಜನಾ ಮನಾ ಯೆವ್ಚಿ ತಸ್ಸಿ ಪ್ರಭಾವೀ ದಾವ್ನು ಪ್ರಸ್ತುತ ಕೊರ್ಚೆಂತು ಆಸ್ಚೆ.
ಖಂಚೇ ವಿಷಯು ಕಾಣು ಘೆತ್ಲೆರಿಯಿ,
ವೇದಕಾಲು ಧೋರ್ನು ಚರ್ಚಿತ ದಾವ್ನು ಆಸ್ತಾ. ಪೊಳೋಚೆ ಗೆಲ್ಲೆರಿ ನವೋ ನವೋ ವಿಚಾರು ಮೊಣು ಖಂಚೆಯಿ ವರ್ನಿ.
ಆತ್ತ ಕಸಲೆ ಆಸ್ಲೆರಿ ಚಾಪ್ಡಾಯಿಲೇ ಚಾಪ್ಡಾಚೆ ದಾತ್ತಾ. ನವೆ ನವೆ ಶಬ್ದ ವಾಪಾರ್ನು ಮಿಗೆಲೆ ಸ್ವಂತಾಚೇ
ಸೆ ದಾಕೋನು ’ರಂಗೇರಿಸಿದರು!’ ಕೊರ್ಚೆ. ಆಸ್ಸೊ.
ವಿಷಯು ತಿತ್ಲೆರಿ ರಾಬ್ಬಾನಾ.
ಆನೇಕ ಹೋಡಿ ಸಮಸ್ಯಾ ಆಸ್ಸ. ಖಂಚೊಯಿ ವಿಷಯು ಆಸ್ಸೊ, ಆಮ್ಮೆಲೆ ಮನಾಂತು ಕಸ್ಸಿ ವಾಡ್ಲಾಂಕಿ ತಸೀಂಚಿ
ಶಬ್ದ ರೂಪಾರಿ ಭಾಯ್ರ ಘಾಲ್ಚೆ ಕಷ್ಟ. ತಸ್ಸಿ ವಿವರಣೆ ಕೊರೂಂ ಕಷ್ಟ. ತಸ್ಸಿ ಕರ್ತಾನಾ ತಾಜ್ಜೆ ಗೋಡಿ
ರುಪ್ಪಯೇಕ ಬಾರಾಣೆ ಎಕಯಿ ಸ್ವಲೂಪ ಚಡ ವರ್ತಾ. ತೇಂ ಆಯ್ಕತಲೆಲೆ ಮಾತ್ತೆಂತು ರಿಗ್ತಾನಾ ಆರ್ಧ ದಾತ್ತಾ.
ಇತ್ಲೆ ವ್ಯತ್ಯಾಸು ದಾವ್ನು ಹಾಂವ ಯಶಸ್ವಿ ದಾಲ್ಲೊ ಮ್ಹಣ್ತಾನ, ತೊ ವಿಷಯು ತಾಕ್ಕಾ ತೀರಾ ಅಗತ್ಯ ನಾ
ಮೊಣು ದಿಸ್ಚೆ ಪೂರೊ. ಥಂಯ್ಕ ಕಸನೆ ದಾಲ್ಲೆ ವರಿ ದಾಲ್ಲೆ? ತಾಜ್ಜೆ ಖಾತೀರ ಥಂಡ ಬೊಸ್ಚೆ ಚಾಂಗ ಮೊಣು
ದಿಸ್ತ. ದಾಲ್ಲೆರಿ ತೆ ಎದ್ದೊಳು ಸಾಧ್ಯ ದಾಯ್ನಿ.
ಕೊಣಯಿ ಉಲ್ಲಯ್ತಾನಾ, ಸಾಂಗ್ತಾನಾ
ಮದ್ದೆ ತೋಂಡ ಘಾಲ್ಯಾ ಮೊಣು ದಿಸ್ಚೆ. ಮಾಕ್ಕ ಚಿಕೆ ಚಡ ಗೊತ್ತಸ್ಸ, ತಾಗೆಲೆ ವಿಷಯಾಕ ಪೂರಕ ದಾವ್ನು
ಮಿಗೆಲೊ ವಿಷಯು ಆಸ್ಸ ಮೊಣು ದಿಸ್ಸೂನು ಉಲ್ಲೋಚೆ.
ಸಂಧು ತುಂಟಾನಾಸಿ ಉಲ್ಲೋಚೆ.
ವಿಷಯು ಕಿತ್ಲಿಕೀ ಸಂದರ್ಭಾರಿ
ಸಾಂಗ್ಲಾ, ದಾಲ್ತಿಕೀನಿ ಉಲ್ಲೋಚೆ.
ಉಲ್ಲಯಿಲೇ ಉಲ್ಲೋಚೆ.
ಮಾಗಿರಿ ಛೇ!, ಉಲ್ಲಯಿಲೆ ಚಿಕೆ
ಚಡ ದಾಲ್ಲೆ ಸೆ ದಿಸ್ಚೆ, ಉಲ್ಲೊಚೆ ನಾಕ್ಕ ಆಸ್ಸಿಲೆ ಮೊಣು ದಿಸ್ಚೆ.
ಇತ್ಲೆ ದಾತ್ತಾನ ಪ್ರಾಯ ದಾಲ್ಲೆಲೆ
ಮನ್ಶ ಪೂರಾ ಅಶಿಂ ವ್ಯವಹಾರ ಕರ್ತಾತಿ ಮೊಣ್ಚೆ ಗಮನಾ ಯೆತ್ತಾ.
ವ್ಹಯಿ ನವೆ.!
ಮಾಕ್ಕಾಯಿ ಪ್ರಾಯ ದಾಲ್ಲ ನವೆ.!!
ಕೃಪೆ: ಮುಕುಂದ ನಾಯಕ್
